یولداش یازیسی
مقدمه اوستاد حسین منزوی برمجموعه شعر ترکی «دومان»
«تاری»مین آدینان ...
اورک سؤزو
اوشاق آنا دیلینن دانیشماغی باشلار، منده هامی اوشاقلار کیمین، دیلیم آنا دانیشیغینان آچیلیب. هلهده بیز ائوده باجی قارداشلارینان و آتا- آنامیزنان ائله تورکو دیلیجه دانیشاریق، آمما سؤز بوردادی کی بیزلر دئمک اولور هامی ایرانلیلار کی آنادیلیمیز فارسی دگیل، ایکی نوبت دیل آچاریق. اول دیل آچماغیمیز «تورک» اولوب، «کورد» اولوب، «گیلک» اولوب، «لور» اولوب و هر بیر آیری خلقلر اولساق او خلقین دیلیجه و ایکینجی دیل آچماغیمیز بؤیوک و قدیم و عزیز آنامیز ایرانین دیلیجه اولاجاق.
بو سؤزو بونونچون یازیرام کی او عزیز تورک یولداشلار کی کئچن ایللرده منه اعتراض ائلردیلر کی:
«سن تورکو شعری یازماماغینان - بعضیلری کی تعصّبلاری آرتیغیدی- دییردیلر فارسی شعر یازماغینان اؤز آنادیلین تورکویه، خیانت ائلیرن» بیلهلر کی:
اوّل باشدا کی من هئچ وقت دیمهمیشم کی تورکو شعر یازمامیشام، یا یازمیرام یا یازمییاجام. تورکو منیم عزیز ایستکلی آنا دیلیمدی و اونون شعرینه، ادبیاتینا و هابئله باش با باش فرهنگینه افتخار ائلهمهلییم، اگر ده منی لایق بیلسه، اؤزومو اونا گؤره بوشلو بیلیرم و بو بورجو وئرمهلییم و باجاردیغیمداندا وئرمیشم. شعری چاپ ائلهمهمک بو معنادا دگیل کی شعر یوخدو. چوخ شعرلر گلهجک ایچین دیییلیر. بو بیر سؤز!
ایکینجی سؤز بو کی:
من نئجه کی دیدیم ایکی آنام وار و ایکی نوبت دیل آچمیشام. بیری عزیز، کافور باشلی، آندی چیراغلی قادین کی منی دونیایه گتیریب و دیمک اولور کی من شعریده یاری با یاری اوندان- کی شعر دیمهییب- آما شاعیردی و عزیز آتامدان - کی هم شاعیردی و هم شعر دئییب- ارث آپارمیشام.
و اینکینجی عزیز وطنیم ایران کی قیمتلی توپراغی، قهرمان اوغلانلارین قانیاینان و عزالی آنالارین گؤز یاشینان، سوواریلیب، پس هئچ زامان اولمویوب کی آنا دیلیمه دال چؤوروب، اونو گؤزدن سالمیش اولام. من فارسیجا شعر یازاندا، ائله آنا دیلینده شعر یازیرمیشام. ایندیدهکی بو بالاجا دفتری سیزه ساری گؤندهریرم و تورکو شعرلریمدن نئچهسینده اونا تاپشیریرام کی محضریزه گتیرسین. گینهده ائله عزیز، ایستهمهلی، امکانلی و گئدرلی آنا دیلیم، تورکوده، شعر یازمیشام. دیمهلییم کی: تورکو شعرده، من هلهده کهنهکار اولمامیشام. دیمک اولور کی بولار سیزین کیچیک شاعیریزین تورکو شعرینده- فارسی اصطلاحیجا، دیسم «سیاه مشق»لری دی، کی اگر قبول ائلهسز، سیز عزیز شعر دوستلارینا اتحاف اولور.
خوش یاشییاز
1377 نین باهاری – زنگان
حسین منزوی