«سؤیلر» حاقیندا
ع.م.بیانی
(سؤیلر تخلّصلو اوستاد عباس بابایی، وطن تورپاغینا تاپشیریلارکن اوخودوم):
بیر سونای قارشیلیر سانکی زنگان
گون چیخیر، آی چیخیر، ماوی گؤیلر
من بو معنادا بو عشقه حیران
ساز گلیر، سؤز گلیر، سسلی «سؤیلر»
گون آشیب گئتدی پالچیق دوواردان
مین کوچه دولدو بیر آن باهاردان
یار باخیر، یوز آخاردان باخاردان
تورپاق ای تورپاق ای نازلی دلبر
هانی عشقینده یانمیش بو «سؤیلر»
بیر کوچه، اون کوچه، یوز کوچه وار
ساده وار، اَیری وار، دوز کوچه وار
سؤیلر عشقینده سؤز- سؤز کوچه وار
تورپاق ای تورپاق ای نازلی دلبر
گلدی عشقینده یانمیش بو سؤیلر
یار گلیبدیر سفردن دور ای یار
بادهنی ارغوان دولدور ای یار
«سؤیلر»ین صبری بول- بول دور ای یار
تورپاق ای تورپاق ای نازلی دلبر
گلدی عشقینده یانمیش بو سؤیلر
ای وطن، ای وطن، سن آنام سان
گل بو دا وئردیگین جسم ایله جان
گلمیشم توت منیم قوللاریم دان
تورپاق ای تورپاق ای نازلی دلبر
گلدی عشقینده یانمیش بو سؤیلر
زنگان- 94/2/28/