جین‌لرین اینامی
هاراسیندایام دونیانین ؟
سندن اوزاق اولدوقدا
دئمک
یئرین قیراق بوجاغیندایام
و یئر چکیمینه
اؤنم داشیماییرام.
 
بیر قوووق کیمی
            اوچا دا بیلره‌م
                        یوخارییا
دوشه‌ ده بیلره‌م...
 
هاچاندان بئله ایتیردیم
            اؤلچو – چکیمی
و یئر چکیمینه
            اؤنمیمی؟
 
چات گؤتوردو تبریزده ارک
و اه‌ییلدی زنگاندا
سلطانیه گونبذی
عقربه‌لر بیر آز
            بیزی دئییب دولانمادیلار.
 
*
وئردی‌یین توکو
            توتمایاجام اوت اوزه‌رینه
آت نالینا
            طیلیسیم یازدیریب آتمایاجام اوتا
بیله
            پاخیر اوزه‌رینه جنبل شکیل‌لری چکدیرمه‌یه‌جه‌یم
یازدیرمایاجام دا موحببت پیتی‌یی.
آخی ذاتن
اؤتوبدور سئوگی فصیلی
و بیزیم سئومه‌مه‌ییمیز
            دوعالیق دئییل
 
اؤتمه‌سینه
سئوگی‌ فصیلی‌نین
جین‌لرده اینانیبدیلار
                         
           
اولسو‌ن دا
بورالاردا
نووه‌دن دانیشان باشقان
بیر اؤلکه‌نین آلین یازیسینی
             تاسینا تاپشیریب
جین‌چیلرین
اولسون
آنجاق بیزیم سئومه‌مه‌ییمیز
دوعالیق دئییل.
 
*
کؤرپه‌یه قالمیشدی سئوگیمیز
کؤرپه‌یه قالمیشدیق
بیز
چیچک گزدیریردیک کؤنلوموزده
شاختا شهرلرده.
 
آپارتمانیندا
هارا کیمی بویلانا بیلیب‌
تئرمومترین ایچینده کی جیوه؟
            بو ماسانین اوزه‌ری
            گتیردی‌ییم چیچک‌لره
                        گووه‌نلی‌می سنجه؟
 
*
یئیین سور آرابانی!
"چوبان قایتار قوزونو" اوخودوغوم ایللردن
            بیر فیشقیراق ساخلامیشام
بو شهرده
چئشیت‌لی بیر سسی سسلندیرمک...
اولسون دا
عؤهده‌لیک شاعیری دئییلیم
بیله
عؤهده‌لیک عاشیقی
نسه
جین‌لرین یانیندان گلیرم
و آلین یازیسینا اینسانین، عؤهده‌سیزلیک‌لرینی
دئ دئییب‌لر منه
منی اؤلدور‌سه‌لر
اونو دا
سن سؤیله!
*
سن‌سیز
اؤلوم چکیمینه ده
اؤنملی دئییلم.
 
 
28 شهریور 90
سید حیدر بیات