یاز شعری
رحمتلیک اوستاد غلامرضا مجدفر
باهار گلیر
هاوالار قیزدی، نیاز اولمادی کورکه - کرییه
واخت- او واخت اولدو کی داغلاردا کی قارلار ارییه
ساغمال حئیوانلاری داشقین سودایله یایدی چوبان
گتیریر ساغماغا آخشام چاغی، کنده، برییه
شاققاشاق بوُزلار اریر، سئل- سوُ توُتوب کؤشنیمی
لایبالای دالغالانیب، آخدی، سوُ دولدو درییه
قورخما، حئیوان نه قدر دوشگون اولا، اؤلمیهجک
یازگلیر، آغزی چاتار یونجایا، گؤم- گؤی ترییه
شن باهار، چؤل باییر، هر یئر دولو دوُر نعمت ایله
چوْخ یئییب، پارتلاییر حیئوان، دا سیغیشمیر درییه
نازایله گؤلده اوزور یاشماغی یاشیل صونالار
ناز ائدیر اؤردگه قاز، شیشدی خوروزدا فرییه
مادمازل چوخ دئمه،ائششک قوُدورار، سونجوق آتار
چیخاری یوخدو، یاراشماز بوُ لقب کور زرییه
بوُ پری، چوخ دا حیجابه، دینه پابند دئییل
داز باشین اؤرتمه یه، محکم بورونوب روسرییه
یادا ساللام او شیرین عصری، جاوانلیق چاغینی
کیم قویاردی او زامان، فرق، آغ ایله قرییه
ذوق شوقیله، نه عشقیله گئدردیک جمعه لر
قلّهیه، حکم آوارا، شاهگؤلونه، سردرییه
پهلوان تک چالیشیب بیلمز ایدیک خستهلییی
دؤشهنردیک نئجه آج قوُرد کیمی بیز، بال کرییه
سورا باغلاردا دَرردیک قانالاردان اوزومو
کیم باخاردی آغاج اوستونده قیزارمیش ارییه
خوش گزیب، خوش یاشادیق، گلمزیدی فیکریمیزه
دوُر صفحه آلتی ساعات، سنگک ایله بربرییه
سلقه سهمان بیزیم ائولرده داریخدیردی منی
جارونو بوکمهمیش آرواد، اَل آتیر مرمرییه
بایرام آخشامی اوُشاق تک من اونو توولامیشام
قورخورام عکس اولا ایشلر، او حقیری سرییه۱
----------------------------------------------------
۱. بوُ شعرین سؤیله نیش تاریخی ۱۷/۱۲/۶۸دیر. شعرده " قله" ،" حکم آوار" و " شاه گؤلو" سؤزلری، تبریز شهری نین قدیمی صفالی و دوْلانمالی یئرلرینه اشاره دیر.
قایناق: http://mortezamajdfar.blogfa.com/