اوشاقلاریمیزین ،غریبلیگی شعریندن بللی دیر

بو گونلر هریانا باخیرام و هر ساحه نی آراشدیریرام، عجبا اورادا بیر بوشلوق و نیسگیل گؤرورم .دیلیمیزی، ادبیاتیمیزی و اوسطوره لریمیزی دئییرم ها!

هله تاریخیمیز، موسیقیمیز، اسگی آبیده لریمیز و مدرن وملی دوشونجه لریمیز قالسین.

نیسگیللی و یاندیریجی ساحه لرین ان اونودولموشو اوشاق ادبیاتی ساحه سی دیر؛بو ساحه بیزیم «آشیل دابانی» میزدیر.بیزیم کؤکؤموزدور و نه یاخشی بیلیبلر بیزی هارادان قوروتسونلار.

ایندی گئجه به گوندوز سئچیلمیش موسیقی لرله ،الوان چاپلی و ساحر کتابلارلا ،چئشیتلی گؤزل کارتون لارلا بومباردومان اولان اوشاقلاریمیزا نه ائتمیشیک و نه ائده بیله ریک ؟

من نئچه ایل بوندان قاباق اوشاق شعرینه چوخ فیکیرله شیردیم و بو ساحه ده چالیشماغا جان آتیردیم . سونرا بیر اوشاق شعری مجموعه سی حاضیرلادیم ؛تاسف له هله چاپ ائده بیلمه میشم !شایدده بیر نده نی اوز تنبل لیگیمدن علاوه نئچه شعر مجموعه سینین چاپدان چیخماسی دیر. زنگاندا خانم «آیلار» و اورمودا «بهرام اسدی»و«رامین بیگدلی »جنابلاری  اوشاق شعری یازیب و کتاب یایدیلار؛بو ایش چوخ افتخارلی و سئویندیریجی اولدو. البته آیریلاری دا اوشاق شعری یایدیلار ، اونلاریندا اللری آغریماسین.

آمما دئمه لی یم اوشاق شعرینده هم مضمون ،هم آخیجیلیق باره سینده بؤیوک چتینلیک له قارشیلاشمیشیق.عمومیت له اوشاق لاریمیز بئله بیر شعرلر ایله قونوشا بیلمه ییرلر. او شعرلرین دیلی اوشاق دیلی دگیل؛ثانیا وزن و اوندا آخیجیلیق یوخدور .!اوشاقلار بو شعرلرایله گؤروشنده ائله بیل «امیر علیشیرنوائی »نین جوغاتایی شعرلرینی اوخویورلار!سیزین نظریزه بئله بیر شعرلر نه قدر اوشاقلاری آنا دیلیمیزه ماراقلاندیرا بیلر؟!

ایکی ایل  بوندان قاباق اوغلوم «مهد کودک»! دن بیر شعر اؤرگه نیب گلمیشدی ؛اونو هوس _هووس له منه اوخویارکن ؛عجیبه بیر شعرله قاشیلاشدیم.عؤمرومده هئچ بیر کیمسه دن بئله آخیجی بیر شعر اؤزوده اوشاق شعری ائشیتمه میشدیم.

بو شعرین شاعری منه بللی دگیل؛ آمما منجه اونون «زنگان»لی اولماسی حتمی دیر.شاعرین شعرینده زنگان لهجه سی گؤرسه نیر.بیلمیرم بلکه ده بو شعر خالق ایچینده یارانیب دیر!آنجاق منجه بو شعرین بیر اوخومدا ذهنه اوتورماسی اونونون دیرلی و قالارغی اولماسینا دلیل دیر.آرتیرمالی یام بو شعرده موسیقی گؤزللیگیندن علاوه اوندا درین اؤیره تیم{آموزش}مساله سی واردیر.

بو سیز بو دا او شعر:

«هر اوشاق غذا یئیر

آناسی اونا دئیر

ای منیم گؤزل بالام

من گرک یادان سالام

دیشلرین مسواک ائله

غذالاردان پاک ائله

دیش گرک سارالمییا

دیبلری قارالمییا»