«زنگان یونیوئرسیته» سینده سئودیگیم آنا دیلی

اورگ ائویندن آنا دیلیمیزه آغیر حورمت بسله ین  و بو دیلین مکتب سیزلیگینی ایللر بویو سسله ین گنج لریمیز منی تورکجه گرامر و ادبیات کیلاسینا چاغیردیلار.ایندیسه نئچه هفته اولار بو ماراقلی اویرنجی لریمیزله بیرلیکده آنا دیلی حاققیندا  دانیشیب ،یازیب و اوخویوروق.

بو کلاس ایکینجی جلسه دن ایکی کیلاسا بولوندو. بیرکیلاس تورکلراوچون و

بیریسی ده باشقا اویرنجی لر اوچون.

 دیلیمیزین اینجه لیکلریندن و اوندا گیزلنمیش «ماکس مولئر » دئمه لی معجزه دن آلمالی بنیزلری گول آچیب و سئوگی اودوندا جانلاری قیزان  جاوانلار منی ائلیمیزین گله جه گینه و دیلیمیزین گلیشمه سینه اومودلاندیردیلار.

بو کلاسلاردا بیرآیری نیسگیلین وارلیغینا  توش گلدیم .«تاریخ و میللی تاریخیمیز».

دیلیمیزین گوزل لیگیندن واز گئچه رک، تاریخیمیزین عظمتی و آتا بابا لاریمیز ین نئجه یاشاماسی  ، نئجه فیکیرلشمه سی ،نئجه تانری ایله قونوشماسی و یوزلرله باشقا نئجه لرین جاوابی  گنج لریمیزین بویوک سورغوسودور. بو سوغورلارین جاوابی، مقدس ملی دوشونجه میزین ،جاوانلارذهنینده دورولاشماسینا بویوک یاردیمدیر.بیز اوزگه لرین یاراتدیغی یالان آمما یاییلمیش تاریخله «منفی مبارزه»ائتمه لی ییک. یعنی اونلارلا دویوشمه دن اوز ملی و افتخارلی دوزگون تاریخیمیزی خالق آرا یایمالی ییق.

کتمانچی تاریخلرله ، مناقشه لی دویوشلره گیرمک،یالنیز بیزی یوروب ،یولدان ائده جکدیر. بو آرادا سویوشلره باخمایاراق «اوغوز،سلجوق،قاراقویونلو ،آغ قویونلو،صفوی،آوشار و.....»تاریخلرینی،آتا بابالیق تاریخی کیمی یازیب یایماق چوخلو چوخلو دیزلریمیزه گوج و گوزلریمیزه دینج وئره جکدیر .